ನನ್ನ ಯುವಮಿತ್ರರೊಬ್ಬರು ಮೊನ್ನೆ ಸಿಕ್ಕಾಗ ಕೇಳಿದರು, “ಸಾರ್, ಈ ಕೆ-ಸೆಟ್ (KSET) ಪರೀಕ್ಷೆಯನ್ನು ನೀವು ಹೇಗೆ ಪಾಸ್ ಮಾಡಿದಿರಿ? ಫಸ್ಟ್ ಅಟೆಂಪ್ಟ್ನಲ್ಲಿ ಕ್ಲಿಯರ್ ಮಾಡೋಕೆ ಸಾಧ್ಯವೇ ಇಲ್ವಾ? ಎಷ್ಟೋ ಜನ ಮೂರ್ನಾಲ್ಕು ಬಾರಿ ಬರೆದರೂ ಆಗ್ತಿಲ್ಲ ಅಂತಾರಲ್ಲ?” ಅವರ ಕಣ್ಣಲ್ಲಿ ಒಂದು ಸಣ್ಣ ಅಳುಕಿತ್ತು, ಜೊತೆಗೆ ಗೆಲ್ಲಲೇಬೇಕೆಂಬ ಹಂಬಲವೂ ಇತ್ತು.
ನಾನು ಅವರ ಕಣ್ಣಲ್ಲಿ ಕಣ್ಣಿಟ್ಟು ಹೇಳಿದೆ, “ಯಾರು ಹೇಳಿದ್ದು ಸಾಧ್ಯವಿಲ್ಲ ಅಂತ? ಸರಿಯಾದ ತಂತ್ರಗಾರಿಕೆ, ಗುರಿಯೆಡೆಗಿನ ಸ್ಪಷ್ಟತೆ, ನಿರಂತರತೆ ಮತ್ತು ಛಲವಿದ್ದರೆ ಮೊದಲ ಪ್ರಯತ್ನದಲ್ಲೇ ಕೆ-ಸೆಟ್ ಎಂಬ ಕೋಟೆಯನ್ನು ಲೀಲಾಜಾಲವಾಗಿ ಧ್ವಂಸ ಮಾಡಬಹುದು! ಇದು ಬ್ರಹ್ಮವಿದ್ಯೆಯಲ್ಲ, ನಮ್ಮಂತೆಯೇ ಮನುಷ್ಯರು ಬರೆದು ಪಾಸ್ ಮಾಡುವ ಪರೀಕ್ಷೆ.”
ಮೊದಲ ಪ್ರಯತ್ನದಲ್ಲೇ ಕೆ-ಸೆಟ್ ಮುಡಿಗೇರಿಸಿಕೊಳ್ಳಲು ಇಲ್ಲಿವೆ ನೋಡಿ ಪಕ್ಕಾ ರಣತಂತ್ರಗಳು:
1. ಪಠ್ಯಕ್ರಮವೇ ನಿಮ್ಮ ಭಗವದ್ಗೀತೆ
ನೋಡಿ ಸ್ನೇಹಿತರೆ, ಯುದ್ಧಕ್ಕೆ ಹೋಗುವ ಮುನ್ನ ಶತ್ರುವಿನ ಬಲ-ದೌರ್ಬಲ್ಯ ತಿಳಿಯಬೇಕು. ಕೆ-ಸೆಟ್ ಪರೀಕ್ಷೆಯಲ್ಲಿ ‘ಸಿಲಬಸ್’ ಎನ್ನುವುದೇ ನಿಮ್ಮ ಬೈಬಲ್, ಕುರಾನ್ ಮತ್ತು ಭಗವದ್ಗೀತೆ. ಮೊದಲು ಪಠ್ಯಕ್ರಮದ ಪ್ರಿಂಟ್ ಔಟ್ ತೆಗೆದು ನೀವು ಓದುವ ಟೇಬಲ್ ಮುಂದಿನ ಗೋಡೆಗೆ ಅಂಟಿಸಿ. ಸಿಲಬಸ್ನಲ್ಲಿ ಇರುವುದನ್ನು ಬಿಟ್ಟು ಬೇರೇನನ್ನೂ ಓದಬೇಡಿ, ಅದರಲ್ಲಿ ಇರುವುದನ್ನು ಯಾವುದನ್ನೂ ಬಿಡಬೇಡಿ. ನೀವು ಓದುತ್ತಿರುವ ಪ್ರತಿಯೊಂದು ಸಾಲೂ ಸಿಲಬಸ್ಗೆ ಕನೆಕ್ಟ್ ಆಗಿರಬೇಕು.
2. ಹಳೆಯ ಪ್ರಶ್ನೆಪತ್ರಿಕೆಗಳೇ ದಿಕ್ಸೂಚಿ
ಬಹಳಷ್ಟು ಜನ ಮಾಡುವ ತಪ್ಪು ಎಂದರೆ, ಮಾರುಕಟ್ಟೆಯಲ್ಲಿ ಸಿಗುವ ಯಾವುದೋ ಒಂದು ಗೈಡ್ ತಂದು ಓದಲು ಶುರು ಮಾಡುತ್ತಾರೆ. ಖಂಡಿತ ಬೇಡ. ಕಳೆದ ಐದರಿಂದ ಹತ್ತು ವರ್ಷಗಳ ಹಳೆಯ ಪ್ರಶ್ನೆಪತ್ರಿಕೆಗಳನ್ನು ಕಲೆಹಾಕಿ. ಅವುಗಳನ್ನು ಕೇವಲ ಓದುವುದಲ್ಲ, ಶವಪರೀಕ್ಷೆ (Post-mortem) ಮಾಡಿ! ಆ ಪ್ರಶ್ನೆಗಳನ್ನು ಯಾವ ದೃಷ್ಟಿಕೋನದಲ್ಲಿ ಕೇಳಲಾಗಿದೆ? ಪರೀಕ್ಷಕನ ಮೈಂಡ್ಸೆಟ್ ಏನು? ಎಂಬುದು ನಿಮಗೆ ಅರ್ಥವಾಗಬೇಕು. ಹಳೆಯ ಪ್ರಶ್ನೆಪತ್ರಿಕೆಗಳನ್ನು ಬಿಡಿಸುತ್ತಾ ಹೋದರೆ ನಿಮ್ಮ ಆತ್ಮವಿಶ್ವಾಸ ನೂರ್ಮಡಿಯಾಗುತ್ತದೆ.
3. ಪೇಪರ್-1: ನಿಮ್ಮ ಗೆಲುವಿನ ಬ್ರಹ್ಮಾಸ್ತ್ರ
ಇಲ್ಲೊಂದು ದೊಡ್ಡ ಗುಟ್ಟಿದೆ. ನೀವು ನಿಮ್ಮ ಸ್ನಾತಕೋತ್ತರ ವಿಷಯದಲ್ಲಿ-ಉದಾಹರಣೆಗೆ ಇಂಗ್ಲಿಷ್ ಸಾಹಿತ್ಯವೋ, ಇತಿಹಾಸವೋ, ಕನ್ನಡವೋ-ಎಷ್ಟೇ ಘಟಾನುಘಟಿ ಪಾಂಡಿತ್ಯ ಹೊಂದಿದ್ದರೂ, ‘ಪೇಪರ್-1’ (General Paper) ಅನ್ನು ನಿರ್ಲಕ್ಷ್ಯ ಮಾಡಿದರೆ ಗೋವಿಂದಾ! ಪೇಪರ್-1 ಎಲ್ಲರಿಗೂ ಸಾಮಾನ್ಯ. ಟೀಚಿಂಗ್ ಆಪ್ಟಿಟ್ಯೂಡ್ (Teaching Aptitude), ರಿಸರ್ಚ್, ರೀಸನಿಂಗ್, ಡೇಟಾ ಇಂಟರ್ಪ್ರಿಟೇಷನ್… ಇವುಗಳಲ್ಲಿ ನೀವು ಎಷ್ಟು ಹೆಚ್ಚು ಸ್ಕೋರ್ ಮಾಡುತ್ತೀರೋ, ನಿಮ್ಮ ಗೆಲುವಿನ ಹಾದಿ ಅಷ್ಟು ಸುಗಮವಾಗುತ್ತದೆ. ಕನಿಷ್ಠ ೭೫-೮೦ ಅಂಕಗಳನ್ನು ಪೇಪರ್-1 ರಲ್ಲಿ ಗಳಿಸುವ ಗುರಿ ನಿಮ್ಮದಾಗಿರಲಿ.
4. ಮೂಲ ಪುಸ್ತಕಗಳ ಅಧ್ಯಯನ ಮತ್ತು ಸ್ವಂತ ನೋಟ್ಸ್
ಯಾರೋ ಮಾಡಿಕೊಟ್ಟ ರೆಡಿಮೇಡ್ ನೋಟ್ಸ್ ಓದುವುದಕ್ಕಿಂತ, ನೀವು ಓದುತ್ತಾ ಸ್ವತಃ ಮಾಡಿಕೊಳ್ಳುವ ‘ಶಾರ್ಟ್ ನೋಟ್ಸ್’ ಪರೀಕ್ಷೆಯ ಹಿಂದಿನ ದಿನ ಸಂಜೀವಿನಿಯಂತೆ ಕೆಲಸ ಮಾಡುತ್ತದೆ. ನಿಮ್ಮ ವಿಷಯಕ್ಕೆ ಸಂಬಂಧಿಸಿದಂತೆ ವಿಶ್ವವಿದ್ಯಾಲಯ ಮಟ್ಟದ ಅತ್ಯುತ್ತಮ ರೆಫರೆನ್ಸ್ ಪುಸ್ತಕಗಳನ್ನು ಮಾತ್ರ ಓದಿ. ಕಾನ್ಸೆಪ್ಟ್ ಸ್ಪಷ್ಟವಾಗಿದ್ದರೆ, ಪ್ರಶ್ನೆಯನ್ನು ಹೇಗೆ ತಿರುಚಿ ಕೇಳಿದರೂ ಉತ್ತರ ಬರೆಯುವ ತಾಕತ್ತು ಬರುತ್ತದೆ.
5. ನಿರಂತರತೆ ಮತ್ತು ರಿವಿಷನ್
ದಿನಕ್ಕೆ ಹದಿನಾಲ್ಕು ಗಂಟೆ ಓದಬೇಕು ಅಂತೇನಿಲ್ಲ. ದಿನಕ್ಕೆ ಕೇವಲ 4-5 ಗಂಟೆ ಓದಿದರೂ ಸಾಕು, ಆದರೆ ಆ ಓದಿನಲ್ಲಿ ಏಕಾಗ್ರತೆ ಇರಲಿ. ಮೊಬೈಲ್, ಸೋಷಿಯಲ್ ಮೀಡಿಯಾಗಳನ್ನು ಸ್ವಲ್ಪ ದಿನ ದೂರ ಇಡಿ. ವಾರಪೂರ್ತಿ ಓದಿದ್ದನ್ನು ಭಾನುವಾರ ಕಡ್ಡಾಯವಾಗಿ ‘ರಿವಿಷನ್’ ಮಾಡಿ. ಮನುಷ್ಯನ ಮೆದುಳು ಮರೆಯುವ ಸ್ವಭಾವದ್ದು, ಪದೇ ಪದೇ ಮೆಲುಕು ಹಾಕುವುದರಿಂದ ಮಾತ್ರ ವಿಷಯಗಳು ತಲೆಯಲ್ಲಿ ಅಚ್ಚಳಿಯದೆ ಉಳಿಯುತ್ತವೆ.
6. ಅಣಕು ಪರೀಕ್ಷೆಗಳು (Mock Tests) ಮತ್ತು ಸಮಯ ನಿರ್ವಹಣೆ
ಪರೀಕ್ಷಾ ಕೊಠಡಿಯಲ್ಲಿ ಎಲ್ಲರಿಗೂ ದೊಡ್ಡ ಶತ್ರು ‘ಸಮಯ’. ಪ್ರಶ್ನೆಗಳಿಗೆ ಉತ್ತರ ಗೊತ್ತಿರುತ್ತದೆ, ಆದರೆ ಬರೆಯಲು ಸಮಯವಿರುವುದಿಲ್ಲ. ಇದಕ್ಕಾಗಿ ಮನೆಯಲ್ಲಿಯೇ ಟೈಮರ್ ಇಟ್ಟುಕೊಂಡು ಅಣಕು ಪರೀಕ್ಷೆಗಳನ್ನು ಬರೆಯಿರಿ. ಮೂರು ಗಂಟೆಗಳ ಕಾಲ ಒಂದೇ ಕಡೆ ಕುಳಿತು ಪರೀಕ್ಷೆ ಎದುರಿಸುವ ಮಾನಸಿಕ ಮತ್ತು ದೈಹಿಕ ಸಿದ್ಧತೆ ಮಾಡಿಕೊಳ್ಳಿ.
ಕೊನೆಯದಾಗಿ ಒಂದು ಮಾತು. ಸ್ನೇಹಿತರೆ, ಕೆ-ಸೆಟ್ ನಿಮ್ಮ ತಾಳ್ಮೆ ಮತ್ತು ಶ್ರದ್ಧೆಯನ್ನು ಒರೆಗಲ್ಲಿಗೆ ಹಚ್ಚುತ್ತದೆ. ನಿಮ್ಮೊಳಗಿನ ಭವಿಷ್ಯದ ಅತ್ಯುತ್ತಮ ಉಪನ್ಯಾಸಕನನ್ನು ಜಾಗೃತಗೊಳಿಸುವ ಪ್ರಕ್ರಿಯೆ ಇದು. “ನನ್ನಿಂದ ಸಾಧ್ಯವಿಲ್ಲ, ಕಾಂಪಿಟೇಷನ್ ಬಹಳ ಇದೆ” ಎಂಬ ನಕಾರಾತ್ಮಕ ಮಾತುಗಳಿಗೆ ಕಿವುಡರಾಗಿಬಿಡಿ. ನಿಮ್ಮ ಸ್ಪರ್ಧೆ ಬೇರೆಯವರ ಜೊತೆಗಲ್ಲ, ನಿನ್ನೆಯ ನಿಮ್ಮ ಜೊತೆಗೆ. ನಿಮ್ಮ ಗುರಿ, ನಿಮ್ಮ ಶ್ರಮ ಮತ್ತು ನಿಮ್ಮ ನಂಬಿಕೆ-ಈ ಮೂರು ಒಟ್ಟಾದರೆ, ಮೊದಲ ಪ್ರಯತ್ನದಲ್ಲೇ ಕೆ-ಸೆಟ್ ಪಾಸ್ ಮಾಡುವುದು ಶತಸಿದ್ಧ!
ಎದ್ದು ನಿಲ್ಲಿ, ಪುಸ್ತಕ ಕೈಗೆತ್ತಿಕೊಳ್ಳಿ. ಯಶಸ್ಸು ನಿಮಗಾಗಿ ಕಾಯುತ್ತಿದೆ! ಆಲ್ ದಿ ಬೆಸ್ಟ್!
ಶಿವರಾಜ ಸೂ. ಸಣಮನಿ
ಲೇಖಕರು: ಮದಗುಣಕಿ
M.A.,B.Ed.,KSET
