ರಾಜ್ಯದಲ್ಲಿ ಹಾಲು ಮತ್ತು ಮೊಸರಿನ ದರ ಹೆಚ್ಚಳವಾದ ಬೆನ್ನಲ್ಲೇ, ಇದೀಗ ಸರ್ಕಾರವು ಸಾರ್ವಜನಿಕರಿಗೆ ಮತ್ತೊಂದು ದೊಡ್ಡ ಶಾಕ್ ನೀಡಿದೆ. ಕೆಎಸ್‌ಆರ್‌ಟಿಸಿ ಹಾಗೂ ಬಿಎಂಟಿಸಿ ಬಸ್‌ಗಳ ಪ್ರಯಾಣ ದರವನ್ನು ಗಣನೀಯವಾಗಿ ಹೆಚ್ಚಳ ಮಾಡಲಾಗಿದ್ದು, ಪರಿಷ್ಕೃತ ದರಗಳು ಇಂದು ಮಧ್ಯರಾತ್ರಿಯಿಂದಲೇ ಜಾರಿಗೆ ಬರಲಿವೆ. ದೀಪಾವಳಿ ಹಬ್ಬದ ಸಂಭ್ರಮದಲ್ಲಿರುವ ರಾಜ್ಯದ ಜನತೆಗೆ ಈ ಬಸ್ ಟಿಕೆಟ್ ದರ ಏರಿಕೆಯು ನುಂಗಲಾರದ ತಂಗಡವಾಗಿ ಪರಿಣಮಿಸಿದೆ.
ಮಾಸಿಕ ಪಾಸ್ ಮತ್ತು ವೋಲ್ವೋ ದರಗಳಲ್ಲಿ ಬಾರೀ ಏರಿಕೆ ದೈನಂದಿನ ಪ್ರಯಾಣಿಕರಿಗೆ ದರ ಏರಿಕೆಯ ಬಿಸಿ ಜೋರಾಗಿಯೇ ತಟ್ಟಲಿದೆ. ಬಿಎಂಟಿಸಿ ಸಾಮಾನ್ಯ ತಿಂಗಳ ಪಾಸ್ ದರವನ್ನು ಬರೋಬ್ಬರಿ 300 ರೂಪಾಯಿಗಳಷ್ಟು ಹೆಚ್ಚಿಸಲಾಗಿದೆ. ಅಂದರೆ, ಈ ಮೊದಲು 1,200 ರೂಪಾಯಿ ಇದ್ದ ತಿಂಗಳ ಪಾಸ್‌ನ ದರ ಈಗ 1,500 ರೂಪಾಯಿಗೆ ತಲುಪಿದೆ. ಇನ್ನು ಮಾಸಿಕ ವೋಲ್ವೋ ಪಾಸ್ ದರವನ್ನು 2,380 ರೂಪಾಯಿಯಿಂದ 2,500 ರೂಪಾಯಿಗೆ ಹೆಚ್ಚಳ ಮಾಡಲಾಗಿದೆ.
ಕೆಎಸ್‌ಆರ್‌ಟಿಸಿ ಸಾಮಾನ್ಯ ಮತ್ತು ವೇಗದೂತ ಬಸ್ ದರಗಳ ವಿವರ ಕೆಎಸ್‌ಆರ್‌ಟಿಸಿ ಬಸ್‌ಗಳಲ್ಲಿ ಪ್ರಯಾಣಿಸುವವರಿಗೆ ದರ ಹೆಚ್ಚಳದ ಪೆಟ್ಟು ಬಿದ್ದಿದೆ. ಸಾಮಾನ್ಯ ಬಸ್‌ಗಳಲ್ಲಿ ಮೊದಲ 5 ಹಂತಗಳ ಪ್ರಯಾಣಕ್ಕೆ ಗರಿಷ್ಠ 9 ರೂ. ಹಾಗೂ ವೇಗದೂತ ಬಸ್‌ಗಳಲ್ಲಿ 10 ಹಂತಗಳವರೆಗೆ ಗರಿಷ್ಠ 18 ರೂ. ಹೆಚ್ಚಳವಾಗಿದೆ.
ಸಾಮಾನ್ಯ ಸಾರಿಗೆ (ಬೆಂಗಳೂರಿನಿಂದ ಸುಪರ್ಬ್ಸ್‌): ನೆಲಮಂಗಲ, ಹೊಸಕೋಟೆಗೆ ದರ 35 ರೂ. ನಿಂದ 44 ರೂ.ಗೆ ಏರಿಕೆಯಾಗಿದ್ದರೆ, ದೊಡ್ಡಬಳ್ಳಾಪುರ ಮತ್ತು ಆನೇಕಲ್‌ಗೆ 38 ರೂ. ನಿಂದ 47 ರೂ.ಗೆ ಹೆಚ್ಚಾಗಿದೆ. ಮಾಗಡಿ ಹಾಗೂ ಮಾಲೂರು ಪ್ರಯಾಣ ದರ 46 ರೂ. ನಿಂದ 57 ರೂ.ಗೆ ಏರಿದೆ.
ವೇಗದೂತ ಸಾರಿಗೆ (ಜಿಲ್ಲಾ ಕೇಂದ್ರಗಳಿಗೆ): ಬೆಂಗಳೂರಿನಿಂದ ತುಮಕೂರು, ಕೋಲಾರಕ್ಕೆ 100 ರೂ., ಮೈಸೂರಿಗೆ 197 ರೂ., ಹಾಸನಕ್ಕೆ 270 ರೂ., ಚಿಕ್ಕಮಗಳೂರಿಗೆ 363 ರೂ., ದಾವಣಗೆರೆಗೆ 390 ರೂ. ಮತ್ತು ಶಿವಮೊಗ್ಗಕ್ಕೆ 419 ರೂ. ತಲುಪಿದೆ. ದೂರದ ಊರುಗಳಾದ ಮಂಗಳೂರಿಗೆ 521 ರೂ., ಹುಬ್ಬಳ್ಳಿಗೆ 613 ರೂ., ಬೆಳಗಾವಿಗೆ 742 ರೂ. ಹಾಗೂ ಕಲಬುರಗಿಗೆ 928 ರೂಪಾಯಿಗೆ ಟಿಕೆಟ್ ದರ ಹೆಚ್ಚಳವಾಗಿದೆ.
ಬಿಎಂಟಿಸಿ, ವಜ್ರ ಹಾಗೂ ಏರ್‌ಪೋರ್ಟ್‌ ವಾಯುವಜ್ರ ಬಸ್‌ಗಳ ನೂತನ ದರ ನಗರ ಸಾರಿಗೆ ಸಂಸ್ಥೆಯಾದ ಬಿಎಂಟಿಸಿಯಲ್ಲಿ ಪ್ರತಿ ಸ್ಟೇಜ್‌ಗೆ 4 ರೂ. ನಂತೆ ಹಂತ-ಹಂತವಾಗಿ ಏರಿಕೆಯಾಗಿದ್ದು, ದೂರದ ಪ್ರಯಾಣಕ್ಕೆ ಗರಿಷ್ಠ 12 ರೂ. ಹೆಚ್ಚಿಸಲಾಗಿದೆ (2 ಕಿ.ಮೀವರೆಗೆ 4 ರೂ., 2 ರಿಂದ 4 ಕಿ.ಮೀಗೆ 6 ರೂ. ಏರಿಕೆ). ಎಸಿ ವಜ್ರ ಬಸ್‌ಗಳಲ್ಲಿ 6 ಕಿ.ಮೀವರೆಗೆ 5 ರೂ. ಹಾಗೂ 6 ರಿಂದ 18 ಕಿ.ಮೀಗೆ 10 ರೂ. ಏರಿಕೆಯಾಗಿದ್ದು, ಗರಿಷ್ಠ ದರ 75 ರೂ. ನಿಂದ 90 ರೂ.ಗೆ ಏರಿದೆ. Kempegowda ಏರ್‌ಪೋರ್ಟ್‌ಗೆ ಸಂಚರಿಸುವ ‘ವಾಯುವಜ್ರ’ ಬಸ್‌ಗಳ ಗರಿಷ್ಠ ಪ್ರಯಾಣ ದರ 405 ರೂ. ನಿಂದ 425 ರೂ.ಗೆ ಹೆಚ್ಚಳವಾಗಿದೆ.
ಶಕ್ತಿ ಯೋಜನೆ ಮುಂದುವರಿಕೆ: ಖಾಸಗಿ ಬಸ್ ದರವೂ ಏರಿಕೆಯಾಗುವ ಸಾಧ್ಯತೆ ಸರ್ಕಾರಿ ಬಸ್‌ಗಳ ಟಿಕೆಟ್ ದರಗಳು ಏರಿಕೆಯಾಗಿದ್ದರೂ ಸಹ, ‘ಶಕ್ತಿ ಯೋಜನೆ’ಯ ಅಡಿಯಲ್ಲಿ ಮಹಿಳೆಯರಿಗೆ ಇರುವ ಉಚಿತ ಪ್ರಯಾಣ ಸೇವೆ ಮುಂದುವರಿಯಲಿದೆ. ಆದರೆ, ಸರ್ಕಾರಿ ಬಸ್‌ಗಳ ದರ ಏರಿಕೆಯ ಬೆನ್ನಲ್ಲೇ ಖಾಸಗಿ ಬಸ್ ಮಾಲೀಕರು ಸಹ ತಮ್ಮ ಟಿಕೆಟ್ ದರಗಳನ್ನು ಶೇಕಡಾ 30 ರಿಂದ 50 ರಷ್ಟು ಹೆಚ್ಚಿಸುವ ಎಲ್ಲಾ ಸಾಧ್ಯತೆಗಳಿವೆ. ಇದು ಸಾಲು ಸಾಲು ರಜೆಗಳ ಸಂದರ್ಭದಲ್ಲಿ ಊರುಗಳಿಗೆ ಪ್ರಯಾಣಿಸುವ ಸಾರ್ವಜನಿಕರ ಜೇಬಿಗೆ ಮತ್ತಷ್ಟು ಕತ್ತರಿ ಬೀಳುವಂತೆ ಮಾಡಿದೆ.
