ನಮ್ಮ ಮೆಟ್ರೋಗೆ ರಾಜ್ಯಕ್ಕಿಂತ ಕೇಂದ್ರದ ಪಾಲೇ ಹೆಚ್ಚು: ಸಂಸದ ತೇಜಸ್ವಿ ಸೂರ್ಯ ಈ ಅಂಕಿಅಂಶಗಳ ಸಹಿತ ತಿರುಗೇಟು

ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (BMRCL) ಯೋಜನೆಗಳಿಗೆ ಕೇಂದ್ರ ಸರ್ಕಾರ ನೀಡುವ ಪ್ರತಿ 1 ರೂಪಾಯಿಗೆ ರಾಜ್ಯ ಸರ್ಕಾರ 5 ರೂಪಾಯಿ ನೀಡುತ್ತಿದೆ ಎಂಬ ರಾಜ್ಯ ಕಾಂಗ್ರೆಸ್ ಸರ್ಕಾರದ ವಾದವನ್ನು ಬೆಂಗಳೂರು ದಕ್ಷಿಣ ಸಂಸದ ತೇಜಸ್ವಿ ಸೂರ್ಯ ತೀವ್ರವಾಗಿ ಖಂಡಿಸಿದ್ದಾರೆ.

!
ರಾಜ್ಯ ಸರ್ಕಾರ ಬಿಡುಗಡೆ ಮಾಡಿದ್ದ ‘ನಮ್ಮ ಮೆಟ್ರೋ: ಅನುದಾನದ ಸತ್ಯಾಂಶಗಳು’ (Namma Metro: The Funding Facts) ವರದಿಗೆ ಸಂಬಂಧಿಸಿದಂತೆ ಅವರು ಇಂದು ಅಂಶವಾರು ಸತ್ಯಶೋಧನಾ (Fact-check) ವರದಿಯನ್ನು ಬಿಡುಗಡೆ ಮಾಡಿದ್ದು, ರಾಜ್ಯ ಸರ್ಕಾರವು ದಾರಿತಪ್ಪಿಸುವ ಲೆಕ್ಕಾಚಾರಗಳ ಮೂಲಕ ಜನರನ್ನು ದಿಕ್ಕುತಪ್ಪಿಸುತ್ತಿದೆ ಎಂದು ಆರೋಪಿಸಿದ್ದಾರೆ.

​ಬಿಎಂಆರ್‌ಸಿಎಲ್‌ನ 1 ರಿಂದ 3ನೇ ಹಂತದವರೆಗಿನ ಒಟ್ಟು ₹77,891 ಕೋಟಿ ವೆಚ್ಚದ ಅನುಮೋದಿತ ಅನುದಾನ ಯೋಜನೆಯ ಪ್ರಕಾರ, ಕೇಂದ್ರ ಸರ್ಕಾರ ₹41,558 ಕೋಟಿ (ಶೇ. 53.35) ನೀಡುತ್ತಿದ್ದರೆ, ಕರ್ನಾಟಕ ಸರ್ಕಾರ ₹36,333 ಕೋಟಿ (ಶೇ. 46.65) ಭರಿಸುತ್ತಿದೆ ಎಂದು ಸಂಸದರು ಅಂಕಿಅಂಶಗಳ ಸಮೇತ ವಿವರಿಸಿದ್ದಾರೆ. ಕೇಂದ್ರದ ಸಾರ್ವಭೌಮ ಖಾತರಿಯ (Sovereign Guarantee) ಮೂಲಕ ಪಡೆಯಲಾದ ₹28,958 ಕೋಟಿ ವಿದೇಶಿ ಸಾಲವನ್ನು ರಾಜ್ಯ ಸರ್ಕಾರ ತನ್ನ ಖಾತೆಗೆ ಸೇರಿಸಿಕೊಂಡು, ಅನುದಾನದ ಅನುಪಾತವನ್ನು 84:16 ಎಂದು ತಪ್ಪಾಗಿ ಬಿಂಬಿಸುತ್ತಿದೆ ಎಂದು ಅವರು ಟೀಕಿಸಿದ್ದಾರೆ.

​ಸಂಸದ ತೇಜಸ್ವಿ ಸೂರ್ಯ ಅವರು ಬಿಡುಗಡೆ ಮಾಡಿರುವ ಪ್ರಮುಖ ಅಂಶಗಳು ಇಂತಿವೆ:

​84:16 ಅನುದಾನದ ವಾದ ದಾರಿತಪ್ಪಿಸುವಂತಿದೆ: ಬಿಎಂಆರ್‌ಸಿಎಲ್‌ನ ಅಧಿಕೃತ ಯೋಜನೆಯ ಪ್ರಕಾರ ಕೇಂದ್ರದ ಪಾಲು ಶೇ. 53.35 ರಷ್ಟಿದ್ದು, ರಾಜ್ಯದ ಪಾಲಿಗಿಂತ (ಶೇ. 46.65) ಹೆಚ್ಚಾಗಿದೆ. ಹಣ ಅದೇ ಆಗಿದ್ದರೂ, ಕೇವಲ ಲೆಕ್ಕಪತ್ರದ ತೋರಿಕೆಯನ್ನು ಬದಲಾಯಿಸಿ ರಾಜ್ಯ ಸರ್ಕಾರ ಸುಳ್ಳು ಮಾಹಿತಿ ನೀಡುತ್ತಿದೆ.
​ವಿದೇಶಿ ಸಾಲ ಮರುಪಾವತಿಯ ಗೊಂದಲ: ವಿದೇಶಿ ಸಾಲಗಳಿಗೆ ಬಿಎಂಆರ್‌ಸಿಎಲ್ ನೇರ ಸಾಲಗಾರನಾಗಿದ್ದು, ಇವು 20-30 ವರ್ಷಗಳ ದೀರ್ಘಾವಧಿಯ ಸಾಲಗಳಾಗಿವೆ. ಈಗಾಗಲೇ ಶೇ. 90 ರಷ್ಟು ಸಾಲ ಮರುಪಾವತಿಯಾಗಿದೆ ಎಂಬ ತನ್ನ ವಾದವನ್ನು ಸಾಬೀತುಪಡಿಸಲು ರಾಜ್ಯ ಸರ್ಕಾರವು ಸಾಲ ನೀಡಿದ ಸಂಸ್ಥೆಗಳವಾರು ಮರುಪಾವತಿ ವಿವರಗಳನ್ನು ಬಹಿರಂಗಪಡಿಸಬೇಕು ಎಂದು ಅವರು ಸವಾಲು ಹಾಕಿದ್ದಾರೆ.
​ಯೋಜನೆಗಳ ಅನುಮೋದನೆ ವಿಳಂಬಕ್ಕೆ ರಾಜ್ಯವೇ ಕಾರಣ: ಮೋದಿ 3.0 ಸರ್ಕಾರ ಅಧಿಕಾರಕ್ಕೆ ಬಂದ 100 ದಿನಗಳ ಒಳಗಾಗಿ, ಅಂದರೆ 2024ರ ಆಗಸ್ಟ್ 16ರಂದೇ ಕೇಂದ್ರ ಸಚಿವ ಸಂಪುಟವು ಆರೆಂಜ್ ಲೈನ್ (3ನೇ ಹಂತ) ಯೋಜನೆಗೆ ಅನುಮೋದನೆ ನೀಡಿದೆ. ಆದರೆ ರಾಜ್ಯ ಸರ್ಕಾರದ ಅವೈಜ್ಞಾನಿಕ ‘ಡಬಲ್ ಡೆಕ್ಕರ್’ ಯೋಜನೆ ಮತ್ತು ಒಪ್ಪಂದಗಳ (MoU) ಪ್ರಕ್ರಿಯೆಯಿಂದಾಗಿ ಯೋಜನೆ ವಿಳಂಬವಾಗಿದೆ ಎಂದು ಸೂರ್ಯ ದೂರಿದ್ದಾರೆ.
​ಹಂತ-3A ವೆಚ್ಚ ಕಡಿತ ಮತ್ತು ಪರ್ಯಾಯ ಯೋಜನೆಗಳ ಆತಂಕ: ಕೇಂದ್ರ ಸರ್ಕಾರದ ಕಟ್ಟುನಿಟ್ಟಿನ ಪರಿಶೀಲನೆಯಿಂದಾಗಿ ಹಂತ-3A ಯೋಜನೆಯ ಪ್ರಸ್ತಾವಿತ ವೆಚ್ಚವು ₹28,405 ಕೋಟಿಯಿಂದ ₹25,999 ಕೋಟಿಗೆ ಇಳಿಕೆಯಾಗಿದ್ದು, ₹2,406 ಕೋಟಿ ಉಳಿತಾಯವಾಗಿದೆ. ಆದರೆ ಹೆಬ್ಬಾಳ ಕಾರಿಡಾರ್ ಸುತ್ತಮುತ್ತ ರಾಜ್ಯ ಸರ್ಕಾರ ಕೈಗೆತ್ತಿಕೊಂಡಿರುವ ಉತ್ತರ-ದಕ್ಷಿಣ ಸುರಂಗ ಮಾರ್ಗದಂತಹ ಸ್ಪರ್ಧಾತ್ಮಕ ಯೋಜನೆಗಳು ಸಮಗ್ರ ನಗರ ಯೋಜನೆ ಮತ್ತು ಮೆಟ್ರೋ ಕಾರ್ಯಸಾಧ್ಯತೆಯ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿವೆ ಎಂದಿದ್ದಾರೆ.
​ವೆಚ್ಚ ಹೆಚ್ಚಳದ ಹೊಣೆಗಾರಿಕೆ: ಯೋಜನೆಯ ವೆಚ್ಚ ಹೆಚ್ಚಳದಲ್ಲಿ ಶೇ. 98 ರಷ್ಟನ್ನು ಕರ್ನಾಟಕವೇ ಭರಿಸುತ್ತಿದೆ ಎಂಬುದಕ್ಕೆ ಎರಡೂ ಸರ್ಕಾರಗಳು ಸಹಿ ಹಾಕಿರುವ ಒಪ್ಪಂದದ (MoU) 11ನೇ ಕಲಂ ಕಾರಣವಾಗಿದೆ. ಬೆಲೆ ಏರಿಕೆ, ಯೋಜನೆಯ ವ್ಯಾಪ್ತಿ ಬದಲಾವಣೆ, ತಪ್ಪಿಸಬಹುದಾದ ವಿಳಂಬಗಳು ಮತ್ತು ಸ್ಥಳೀಯ ತೆರಿಗೆಗಳನ್ನು ಭರಿಸಲು ರಾಜ್ಯ ಸರ್ಕಾರವೇ ಒಪ್ಪಿಕೊಂಡಿತ್ತು ಎಂದು ಅವರು ನೆನಪಿಸಿದ್ದಾರೆ.
​ಮೆಟ್ರೋ ಆರ್ಥಿಕ ಸ್ವಾವಲಂಬನೆ: ಟಿಕೆಟ್‌ಯೇತರ ಆದಾಯ (Non-fare revenue) ಸಂಗ್ರಹದಲ್ಲಿನ ವೈಫಲ್ಯ, ಖಾಲಿ ಬಿದ್ದಿರುವ ವಾಣಿಜ್ಯ ಸ್ಥಳಗಳು ಮತ್ತು ಸಾರಿಗೆ ಆಧಾರಿತ ಅಭಿವೃದ್ಧಿಯ (TOD) ಕೊರತೆಯ ಬಗ್ಗೆ ಸಿಎಜಿ (CAG) ಈಗಾಗಲೇ ಆಕ್ಷೇಪ ವ್ಯಕ್ತಪಡಿಸಿದೆ. ಮೆಟ್ರೋ ಆಸ್ತಿಗಳಿಂದ ಆದಾಯ ಗಳಿಸುವಲ್ಲಿ ರಾಜ್ಯ ಸರ್ಕಾರ ವಿಫಲವಾಗಿದ್ದು, ಅದರ ಹೊರೆಯನ್ನು ಬೆಂಗಳೂರಿನ ಪ್ರಯಾಣಿಕರ ಮೇಲೆ ಹಾಕಬಾರದು ಎಂದು ಅವರು ಆಗ್ರಹಿಸಿದ್ದಾರೆ.
​ಪಿಂಕ್ ಲೈನ್ ವಿಳಂಬದ ಸತ್ಯಾಂಶ: 2014ರ ಜನವರಿ 30ರಂದೇ ಕೇಂದ್ರ ಸಚಿವ ಸಂಪುಟದಿಂದ ಅನುಮೋದನೆ ಪಡೆದಿದ್ದ ಪಿಂಕ್ ಲೈನ್‌ನ ಮೊದಲ 7.5 ಕಿ.ಮೀ ಮಾರ್ಗವು ನಾಳೆ (ನವೆಂಬರ್ 13, 2026) ಉದ್ಘಾಟನೆಯಾಗುತ್ತಿದೆ. 2014 ರಿಂದ 2017ರ ನಡುವೆ ಅಧಿಕಾರದಲ್ಲಿದ್ದ ಕಾಂಗ್ರೆಸ್ ಸರ್ಕಾರವು ಎಲಿವೇಟೆಡ್ ಕಾಮಗಾರಿಯ ಗುತ್ತಿಗೆ ನೀಡಲು ವಿಫಲವಾಗಿತ್ತು. 2017ರ ಸೆಪ್ಟೆಂಬರ್‌ನಲ್ಲಿ ಎಲಿವೇಟೆಡ್ ಗುತ್ತಿಗೆ ನೀಡಲಾಯಿತಾದರೂ, 2018ರ ಮಾರ್ಚ್‌ನಲ್ಲಿ ಸುರಂಗ ಮಾರ್ಗದ ಟೆಂಡರ್‌ಗಳನ್ನು ರದ್ದುಗೊಳಿಸಲಾಯಿತು. ತನ್ನದೇ ಆಡಳಿತದ ವೈಫಲ್ಯಗಳಿಗೆ ರಾಜ್ಯ ಸರ್ಕಾರ ಕೇಂದ್ರವನ್ನು ದೂಷಿಸಲು ಸಾಧ್ಯವಿಲ್ಲ ಎಂದು ಅವರು ಹೇಳಿದ್ದಾರೆ.
​2019 ರಿಂದ 2023ರ ನಡುವೆ ರಾಜ್ಯದಲ್ಲಿದ್ದ ಬಿಜೆಪಿ ಸರ್ಕಾರದ ಅವಧಿಯಲ್ಲಿ ಶೇ. 72 ರಷ್ಟು ಸುರಂಗ ಕೊರೆಯುವ ಕಾಮಗಾರಿ ಪೂರ್ಣಗೊಂಡಿತ್ತು. ಸುರಂಗ ಕೊರೆಯುವ ಕಾರ್ಯ ಆರಂಭವಾಗಿದ್ದು 2020ರ ಆಗಸ್ಟ್‌ನಲ್ಲಿ (ಬಿಜೆಪಿ ಸರ್ಕಾರದ ಅವಧಿಯಲ್ಲಿ) ಹೊರತು 2024ರ ಆಗಸ್ಟ್‌ನಲ್ಲಿ ಅಲ್ಲ ಎಂದು ತೇಜಸ್ವಿ ಸೂರ್ಯ ಸ್ಪಷ್ಟಪಡಿಸಿದ್ದಾರೆ.

​ಸಂಸದರ ಪ್ರತಿಕ್ರಿಯೆ:

“ಬೆಂಗಳೂರಿಗೆ ಬೇಕಿರುವುದು ರಾಜಕೀಯ ಕೆಸರೆರಚಾಟ ಅಥವಾ ಅವೈಜ್ಞಾನಿಕ ಮೂಲಸೌಕರ್ಯ ಯೋಜನೆಗಳಲ್ಲ. ಕಾಲಮಿತಿಯೊಳಗೆ ಯೋಜನೆಗಳ ಪೂರ್ಣಗೊಳಿಸುವಿಕೆ, ವೈಜ್ಞಾನಿಕ ನಗರ ಯೋಜನೆ, ಸಹಕಾರಿ ಒಕ್ಕೂಟ ವ್ಯವಸ್ಥೆ ಮತ್ತು ಆರ್ಥಿಕವಾಗಿ ಸದೃಢವಾದ ಮೆಟ್ರೋ ವ್ಯವಸ್ಥೆ ಇಂದಿನ ಅಗತ್ಯವಾಗಿದೆ,” ಎಂದು ತೇಜಸ್ವಿ ಸೂರ್ಯ ಹೇಳಿದ್ದಾರೆ. ಮೆಟ್ರೋ ಯೋಜನೆಗಳಲ್ಲಿ ಕೇಂದ್ರದ ಪಾತ್ರ ಕೇವಲ ಸೀಮಿತವಾಗಿಲ್ಲ; ಅದು ಇಕ್ವಿಟಿ, ಸಾಲ, ವಿದೇಶಿ ಅನುದಾನದ ವ್ಯವಸ್ಥೆ, ಯೋಜನೆಗಳ ಅನುಮೋದನೆ ಹಾಗೂ ಸುರಕ್ಷತಾ ಪ್ರಮಾಣೀಕರಣವನ್ನು ನೀಡುತ್ತದೆ. ದೆಹಲಿ ಮತ್ತು ಮುಂಬೈ ಮೆಟ್ರೋಗಳ ಮಾದರಿಯನ್ನು ರಾಜ್ಯ ಸರ್ಕಾರ ಅಳವಡಿಸಿಕೊಳ್ಳಬೇಕು ಎಂದು ಅವರು ಸಲಹೆ ನೀಡಿದ್ದಾರೆ.

​ಪ್ರತಿ ಮಾರ್ಗದಲ್ಲೂ ಪ್ರತಿ ಮೂರು ನಿಮಿಷಕ್ಕೊಮ್ಮೆ ರೈಲು ಸಂಚರಿಸುವ 300 ಕಿ.ಮೀ ವ್ಯಾಪ್ತಿಯ ಮೆಟ್ರೋ ಜಾಲವನ್ನು ನಿರ್ಮಿಸುವುದು ನಮ್ಮ ಗುರಿಯಾಗಬೇಕು. ರಾಜ್ಯ ಸರ್ಕಾರವು ಆಯ್ದ ಲೆಕ್ಕಾಚಾರಗಳ ಮೂಲಕ ಜನರನ್ನು ದಾರಿತಪ್ಪಿಸುವುದನ್ನು ನಿಲ್ಲಿಸಿ, ತನ್ನ ಜವಾಬ್ದಾರಿಗಳನ್ನು ನಿರ್ವಹಿಸುವ ಮೂಲಕ ಬೆಂಗಳೂರಿನ ಸಂಚಾರ ಮೂಲಸೌಕರ್ಯ ಅಭಿವೃದ್ಧಿಗೆ ಒತ್ತು ನೀಡಬೇಕು ಎಂದು ಸಂಸದರು ಒತ್ತಾಯಿಸಿದ್ದಾರೆ.