ರಾಜ್ಯದ ‘ಕಾರ್ಮಿಕ’ರಿಗೆ ಭರ್ಜರಿ ಸಿಹಿಸುದ್ದಿ: ‘ಕನಿಷ್ಠ ವೇತನ ಪರಿಷ್ಕರಿಸಿ’ ಸರ್ಕಾರ ಅಧಿಕೃತ ಆದೇಶ

ಕರ್ನಾಟಕ ಸರ್ಕಾರವು ಕಾರ್ಮಿಕ ಇಲಾಖೆಯ ವತಿಯಿಂದ ರಾಜ್ಯದ ವಿವಿಧ ಉದ್ದಿಮೆಗಳಲ್ಲಿ ದುಡಿಯುತ್ತಿರುವ ಕಾರ್ಮಿಕರ ಕನಿಷ್ಠ ವೇತನವನ್ನು ಪರಿಷ್ಕರಿಸಿ ಅಧಿಕೃತ ಅಂತಿಮ ಅಧಿಸೂಚನೆಯನ್ನು ಹೊರಡಿಸಿದೆ. ಈ ಕುರಿತಾದ ಸಂಪೂರ್ಣ ವಿವರವಾದ ಲೇಖನ ಹಾಗೂ ವಲಯವಾರು, ಕೌಶಲ್ಯವಾರು ವೇತನದ ಪಟ್ಟಿಯ ಬಗ್ಗೆ ಮುಂದಿದೆ ಓದಿ..

ಹಿನ್ನೆಲೆ ಮತ್ತು ನ್ಯಾಯಾಲಯದ ಆದೇಶ: ಈ ಹಿಂದೆ ಕರ್ನಾಟಕ ರಾಜ್ಯದಲ್ಲಿ 81 ಅನುಸೂಚಿತ ಉದ್ದಿಮೆಗಳಿಗೆ ಪ್ರತ್ಯೇಕವಾಗಿ ವೇತನ ದರಗಳನ್ನು ನಿಗದಿಪಡಿಸಲಾಗುತ್ತಿತ್ತು. 2022-23ನೇ ಸಾಲಿನಲ್ಲಿ ಶೇ. 5 ರಿಂದ 10 ರಷ್ಟು ವೇತನ ಏರಿಕೆ ಮಾಡಿ ಹೊರಡಿಸಲಾಗಿದ್ದ ಅಧಿಸೂಚನೆಗಳನ್ನು ಆಲ್ ಇಂಡಿಯಾ ಟ್ರೇಡ್ ಯೂನಿಯನ್ ಕಾಂಗ್ರೆಸ್ (ಎಐಟಿಯುಸಿ) ಹೈಕೋರ್ಟ್‌ನಲ್ಲಿ ಪ್ರಶ್ನಿಸಿತ್ತು. ಹೈಕೋರ್ಟ್ ಹಳೆಯ ಅಧಿಸೂಚನೆಯನ್ನು ರದ್ದುಪಡಿಸಿ, ಸುಪ್ರೀಂ ಕೋರ್ಟ್‌ನ ಮಾರ್ಗಸೂಚಿಗಳ ಅನ್ವಯ ಹೊಸದಾಗಿ ವೇತನ ಲೆಕ್ಕಾಚಾರ ಮಾಡಲು ನಿರ್ದೇಶನ ನೀಡಿತ್ತು.

ಇದರನ್ವಯ, ರಾಜ್ಯ ಸರ್ಕಾರವು ಎಲ್ಲಾ ವರ್ಗದ ಕಾರ್ಮಿಕರಿಗೂ ಸಮಾನ ಹಾಗೂ ಏಕರೂಪದ ವೇತನ ಸಿಗಬೇಕೆಂಬ ಸದುದ್ದೇಶದಿಂದ 11.04.2025 ರಂದು ಏಕರೂಪದ ಕರಡು ಅಧಿಸೂಚನೆ (Single Draft Notification) ಯನ್ನು ಹೊರಡಿಸಿ ಆಕ್ಷೇಪಣೆಗಳಿಗೆ ಅವಕಾಶ ನೀಡಿತ್ತು. ತದನಂತರ ಕನಿಷ್ಠ ವೇತನ ಸಲಹಾ ಮಂಡಳಿಯ ಶಿಫಾರಸುಗಳು ಮತ್ತು ಕೇಂದ್ರ ಸರ್ಕಾರದ ‘ವೇತನ ಸಂಹಿತೆ 2019’ ರ ನಿಯಮಾವಳಿಗಳನ್ನು ಪರಿಶೀಲಿಸಿ, ಪ್ರಸ್ತುತ ಈ ಅಂತಿಮ ಕನಿಷ್ಠ ವೇತನವನ್ನು ಜಾರಿಗೆ ತರಲಾಗಿದೆ.

ಪ್ರಮುಖ ಷರತ್ತುಗಳು ಮತ್ತು ನಿಯಮಗಳು:

• ಸಮಾನ ವೇತನ: ಮಹಿಳೆಯರು, ಪುರುಷರು, ತೃತೀಯ ಲಿಂಗಿಗಳು ಮತ್ತು ವಿಕಲಚೇತನರು ಒಂದೇ ರೀತಿಯ ಕೆಲಸ ನಿರ್ವಹಿಸಿದರೆ ಸಮಾನ ವೇತನ ನೀಡಬೇಕು.

• ಕೆಲಸದ ಅವಧಿ: ಒಂದು ದಿನದ ಕೆಲಸ ಎಂದರೆ 8 ಗಂಟೆಗಳ ಕೆಲಸ ಎಂದು ಪರಿಗಣಿಸಲಾಗುತ್ತದೆ.

• ಹೆಚ್ಚುವರಿ ಭತ್ಯೆ (Overtime): ನಿಗದಿತ ಅವಧಿಗಿಂತ ಹೆಚ್ಚು ಸಮಯ ಕೆಲಸ ಮಾಡಿದರೆ ಸಾಮಾನ್ಯ ವೇತನದ ಎರಡು ಪಟ್ಟು ವೇತನ ನೀಡಬೇಕು. ವಾರದ ರಜೆ ಅಥವಾ ಹಬ್ಬದ ದಿನಗಳಲ್ಲಿ ಕೆಲಸ ಮಾಡಿದವರಿಗೂ ಎರಡು ಪಟ್ಟು ವೇತನ ಅನ್ವಯವಾಗುತ್ತದೆ.

• ವೇತನ ಪಾವತಿ ವಿಧಾನ: ನೌಕರರ ವೇತನವನ್ನು ಕಡ್ಡಾಯವಾಗಿ ಚೆಕ್ ಮೂಲಕ ಅಥವಾ ನೇರವಾಗಿ ಅವರ ಬ್ಯಾಂಕ್ ಖಾತೆಗೆ ಜಮೆ ಮಾಡಬೇಕಿರುತ್ತದೆ.

• ತುಟ್ಟಿಭತ್ಯೆ (Variable Dearness Allowance): ಗ್ರಾಹಕ ಬೆಲೆ ಸೂಚ್ಯಾಂಕದ (CPI) ಸರಾಸರಿ ಆಧಾರದ ಮೇಲೆ ಪ್ರತಿ ವರ್ಷ ಏಪ್ರಿಲ್ 1 ರಂದು ತುಟ್ಟಿಭತ್ಯೆಯನ್ನು ಲೆಕ್ಕ ಹಾಕಲಾಗುತ್ತದೆ. ಸೂಚ್ಯಾಂಕವು 9469 ಅಂಶಗಳಿಗಿಂತ ಹೆಚ್ಚಾಗುವ ಪ್ರತಿ ಅಂಶಕ್ಕೆ ದಿನಕ್ಕೆ 4 ಪೈಸೆಯಂತೆ ತುಟ್ಟಿಭತ್ಯೆ ಪಾವತಿಸಬೇಕು.

ವಲಯಗಳ ವರ್ಗೀಕರಣ (Zone Classification)

ವೇತನ ದರಗಳನ್ನು ಸುಲಭವಾಗಿ ಅನ್ವಯಿಸಲು ರಾಜ್ಯದ ಪ್ರದೇಶಗಳನ್ನು ಮೂರು ವಲಯಗಳಾಗಿ ವಿಂಗಡಿಸಲಾಗಿದೆ:

1. ವಲಯ-1: ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ ವ್ಯಾಪ್ತಿಗೆ ಬರುವ ಪ್ರದೇಶಗಳು.

2. ವಲಯ-2: ರಾಜ್ಯದ ಇತರೆ ಎಲ್ಲಾ ಮಹಾನಗರ ಪಾಲಿಕೆಗಳು ಮತ್ತು ಜಿಲ್ಲಾ ಕೇಂದ್ರಗಳು.

3. ವಲಯ-3: ವಲಯ-1 ಮತ್ತು ವಲಯ-2 ರ ಪ್ರದೇಶಗಳನ್ನು ಹೊರತುಪಡಿಸಿ ರಾಜ್ಯದ ಇತರೆ ಎಲ್ಲಾ ಭಾಗಗಳು.

ಕನಿಷ್ಠ ವೇತನ ದರಗಳ ಪಟ್ಟಿ (Minimum Wages Chart)

ಅಧಿಸೂಚನೆಯ ಅನುಸೂಚಿ-4 ರ ಪ್ರಕಾರ ವಿವಿಧ ಕೌಶಲ್ಯ ಹೊಂದಿರುವ ಕಾರ್ಮಿಕರಿಗೆ ನಿಗದಿಪಡಿಸಲಾದ ಕನಿಷ್ಠ ವೇತನದ ವಿವರ ಇಲ್ಲಿದೆ:

ವಿಶೇಷ ಅನುಸೂಚಿ ವೇತನ ದರಗಳು (Special Schedules)

1. ಶೌಚಾಲಯಗಳು, ಒಳಚರಂಡಿ ಸ್ವಚ್ಛಗೊಳಿಸುವ (Scavenging) ಕೆಲಸಗಾರರು: ಯಂತ್ರಗಳ ಸಹಾಯದಿಂದ ಒಳಚರಂಡಿ, ಸ್ನಾನಗೃಹ ಮತ್ತು ಶೌಚಾಲಯಗಳನ್ನು ಸ್ವಚ್ಛಗೊಳಿಸುವ ಖಾಸಗಿ ಸಫಾಯಿ ಕರ್ಮಚಾರಿಗಳಿಗೆ ಕೆಳಗಿನ ವೇತನ ನಿಗದಿಯಾಗಿದೆ:

• ವಲಯ-1: ದಿನಕ್ಕೆ ₹989.00 (ತಿಂಗಳಿಗೆ ₹25,714.07)

• ವಲಯ-2: ದಿನಕ್ಕೆ ₹899.09 (ತಿಂಗಳಿಗೆ ₹23,376.43)

• ವಲಯ-3: ದಿನಕ್ಕೆ ₹817.36 (ತಿಂಗಳಿಗೆ ₹21,251.30)

2. ಖಾಸಗಿ ವಿದ್ಯುತ್ ಉತ್ಪಾದನಾ ಘಟಕಗಳು (ಉಷ್ಣ, ಜಲ, ಸೌರ ಮತ್ತು ಪವನ ವಿದ್ಯುತ್ ಸ್ಥಾವರಗಳು):

• ಅತಿ ಕುಶಲ (ಮ್ಯಾನೇಜರ್, ಇಂಜಿನಿಯರ್ ಇತ್ಯಾದಿ): ದಿನಕ್ಕೆ ₹1,316.36 / ತಿಂಗಳಿಗೆ ₹34,225.42 (ವಲಯ-1 ರ ದರಗಳು)

• ಕುಶಲ (ಜೂನಿಯರ್ ಇಂಜಿನಿಯರ್, ಎಲೆಕ್ಟ್ರಿಷಿಯನ್, ಡ್ರೈವರ್ ಇತ್ಯಾದಿ): ದಿನಕ್ಕೆ ₹1,196.69 / ತಿಂಗಳಿಗೆ ₹31,114.02

• ಅರೆ ಕುಶಲ (ಲೈನ್‌ಮನ್, ಅಸಿಸ್ಟೆಂಟ್ ಕುಕ್ ಇತ್ಯಾದಿ): ದಿನಕ್ಕೆ ₹1,087.90 / ತಿಂಗಳಿಗೆ ₹28,285.47

• ಅಕುಶಲ (ಅಟೆಂಡರ್, ಸೆಕ್ಯೂರಿಟಿ, ಹೌಸ್ ಕೀಪರ್ ಇತ್ಯಾದಿ): ದಿನಕ್ಕೆ ₹989.00 / ತಿಂಗಳಿಗೆ ₹25,714.07

ದಿನಗೂಲಿ ನೌಕರರ ದಿನದ ವೇತನವನ್ನು ಲೆಕ್ಕ ಹಾಕುವಾಗ ತಿಂಗಳ ವೇತನವನ್ನು 26 ದಿನಗಳಿಂದ ಭಾಗಿಸಬೇಕು. ವೇತನದ ಲೆಕ್ಕಾಚಾರದಲ್ಲಿ ಚಿಲ್ಲರೆ ಪೈಸೆಗಳು ಬಂದರೆ ಅದನ್ನು ಸಮೀಪದ 50 ಪೈಸೆಗೆ ಪೂರ್ಣಗೊಳಿಸಬೇಕು.